ચાલ, મનુડિયા ચૂંટણી આવી,
આપણા માટે તો જલસા લાવી;
ચાલ, મનુડિયા.....
એક પક્ષના આવી આપશે પચાસ,
બીજા સો આપી મત માગશે ખાસ;
કોઈ વળી બસો જશે પકડાવી,
ચાલ, મનુડિયા.....
રોટલાનાં બટકાં ખાઈ કંટાળ્યા,
એક મહિનો નવા નાસ્તા આવ્યા;
લઈએ મોજની જિંદગી વધાવી,
ચાલ, મનુડિયા.....
ઈંગ્લીશના પેગની આવશે મોજ,
પછી ક્યાં મળવાનું છે રોજેરોજ?
પછી કોણ દેશે બારણું ખટખટાવી,
ચાલ, મનુડિયા.....
અત્યારે તો ભાઈ, કરશે લ્હાણી,
મીઠી-મીઠી તેઓ બોલશે વાણી;
પછી તો સઘળું લેશે પડાવી,
ચાલ, મનુડિયા.....
- ‘સાગર’ રામોલિયા
ટિપ્પણીઓ નથી:
ટિપ્પણી પોસ્ટ કરો