કરે છે!

વાંદરા જેવા અટકચાળા કરે છે!
પાણી વહી ગયું ને તું પાળા કરે છે!

પરોપકારી આટલો થયો ક્યારથી?
પેટને બાળીને અજવાળાં કરે છે!

લલનાની સામે જોતો ટીકીટીકીને,
પછી હનુમાને જઈ માળા કરે છે!

શાંત રહેવાનું નથી ગળથૂથીમાં,
પાણીમાં કાંકરાથી કૂંડાળા કરે છે!

'સાગર' ચેતીને ડગલાં ભરજે તું,
બલાઓ ઝટ મુખ રૂપાળાં કરે છે!

- 'સાગર' રામોલિયા

ભાયડાની ભાગાયણ

બલા પડી પાછળ ભાગ્યો ભાયડો,
સામે બીજી બલાએ પોંખ્યો ભાયડો.

અજ્ઞાનતાથી જ્યાં લીધાં છૂટાછેડા,
મોંઘવારીની બલાથી ચોંક્યો ભાયડો.

કરતી અરાજકતા કાગારોળ,
ભૂખરૂપી બલાથી દાઝ્યો ભાયડો.

દાદાગીરીરૂપી બલા લેતી ભરડો,
બેકારીના ભયથી કૂદ્યો ભાયડો.

આટલાં લગ્ને 'સાગર' તે નથી સુખી,
ભ્રષ્ટાચારી બલામાં ફસ્યો ભાયડો.

- 'સાગર' રામોલિયા