ખિસકોલી (મોનોઈમેજ)

(૧)

ઝાડની ડાળ-ડાળ

જાણે ખિસકોલીના

અવનવા રસ્તા!

(૨)

ખિસકોલીના

પટ્ટાવાળા પારદર્શક

શરીરમાં અટવાયા

શ્રીરામ!

(૩)

 ખિસકોલીથી

સમય

કંટાળતો નહિ હોય!

તે બોલવાનું

બંધ જ

નથી કરતી!

(૪)

શ્રદ્ધા-અંધશ્રદ્ધામાં

અટવાયેલો

 ખિસકોલી જેવો

આપણો જીવ,

નક્કી નથી કરી શકતો

કે

મરેલી ખિસકોલી પાછળ

શેનું દાન કરવું?

સોનાનું કે ચાંદીનું?

કે પછી

આવી કવિતાનું......?

- ‘સાગર’ રામોલિયા

ફૂલોની દુનિયા part 2

(૩)

જુઓ આજ નાચે છે ફૂલોની દુનિયા,

મસ્ત બની રાચે છે ફૂલોની દુનિયા.

‘સાગર’ આ ફૂલો ટમટમતા તારલા,

દુનિયાને વાંચે છે ફૂલોની દુનિયા.

(૪)

ક્યાંય નહિ ઝૂકે આ ફૂલોની દુનિયા,

સૌંદર્ય નહિ મૂકે આ ફૂલોની દુનિયા.

‘સાગર’ જગમાં એની અનેરી અમીરાત,

ભાવ નહિ ચૂકે આ ફૂલોની દુનિયા.

 

- 'સાગર' રામોલિયા

મળો (મુક્તક)

મળો તો હેતથી મળો,

ન કોઈ સંકેતથી મળો.

મળે ‘સાગર’ અંતર રાખી,

એને સો વેંતથી મળો.

- ‘સાગર’ રામોલિયા