બે સહનશીલ

ભારતદેશમાં
સહન કરે
બે જ પાત્રો,
એક જનેતા
અને
બીજી જનતા.

-'સાગર' રામોલિયા

તો મજા આવે!

ઊગે સપનાંનાં ઝાડ તો મજા આવે!
હવાની જાણું નાડ તો મજા આવે!

કરી લેવો છે પ્રેમ ને ડરી ભાગું,
રહે નહિ બીકણ હાડ તો મજા આવે!

લડાઈ જામે શબ્દ-શબ્દ વચ્ચેની,
પડાવી નાખું રાડ તો મજા આવે!

કરી શબ્દોની સાધના બનું ભૂવો,
કરું સૌમાં વળગાડ તો મજા આવે!

હવે 'સાગર' હું તો બનીશ લૂંટારો,
ગઝલ પર પાડું ધાડ તો મજા આવે!

- 'સાગર' રામોલિયા

ઉપાડો તો મને! (ગઝલ)

શક્તિ ગૈ સારી, ઉપાડો તો મને!
બુદ્ધિ ગૈ મારી, ઉપાડો તો મને!

દેહ સૂકો, હાડકાં બે-ચાર છે,
તો જરા ધારી, ઉપાડો તો મને!

ડૂબવાનો છીછરાયે નીરમાં,
લો તમે તારી, ઉપાડો તો મને!

હો' તમોને જીતવાની ચટપટી,
આ ગયો હું હારી, ઉપાડો તો મને!

તોય 'સાગર' ભાર સંસારી ઘણો,
લો થયો ભારી, ઉપાડો તો મને!

- 'સાગર' રામોલિયા