પ્રેમ (ગઝલ)

એમ ને એમ ટપકે છે પ્રેમ,

આભમાં ખૂબ ઝબકે છે પ્રેમ.

આંખના એક પલકારે રોજ,

ચાંદની જેમ ચમકે છે પ્રેમ.

રક્ત હો’ દોડતું દેહે એમ,

દિલમહીં ખૂબ ધડકે છે પ્રેમ.

થાય એ કેમ, જાણે એ કોણ?

સાપની જેમ સરકે છે પ્રેમ

એ જ છે ‘સાગર’ ઘણો અણમોલ,

શું કદી’ ક્યાંય ખટકે છે પ્રેમ?

'સાગર' રામોલિયા

બગીચે ફરીએ (ગઝલ)

(લગાગા લગાગા લગાગા લગાગા લગાગા લગાગા)

લગીરે મળી તો લઈએ, જઈને બગીચે ફરીએ,

વહાલો વહાવી વહીએ, જઈને બગીચે ફરીએ.

પહેલા કરેલી બધી વાત તાજી કરીએ ફરીને,

સુગંધી પળોમાં ઢળીએ, જઈને બગીચે ફરીએ.

ભલી જિંદગીને સજાવા અહીં સ્વપ્ન જોયાં હતાં જે,

ફરી ચાલને નીરખીએ, જઈને બગીચે ફરીએ.

અહીં આપણે ખૂબ ખાધી હતી વાનગીઓ મજાની,

ફરી સ્વાદ એ પીરસીએ, જઈને બગીચે ફરીએ.

હવે ચાલ ‘સાગર’ પુરાણી કથાઓ જ છોડી દઈએ,

નવી વાતને આદરીએ, જઈને બગીચે ફરીએ.

 

- ‘સાગર’ રામોલિયા

લઘુકાવ્ય

એક પંખી
મારી પાસે
આવ્યું
ને બોલ્યું,
"તું હોશિયાર છો?"
લે
મારા જેવો માળો
બનાવી દે...!
- 'સાગર' રામોલિયા