વર્ષનું સરવૈયું (ગઝલ)
(લગાગાગા લગાગાગા લગાગાગા લગાગાગા)
ખુશી સાથે ગમો લાવ્યું, ગજબનું આ વરસ આવ્યું. જરા નિષ્ફળ જરા ફાવ્યું, ગજબનું આ વરસ આવ્યું.
કદી' જાલિમ બની આવ્યું, પરેશાની ધરી દીધી,
કદી' જીવનને સોહાવ્યું, ગજબનું આ વરસ આવ્યું.
ઘણાં એમાં ડરી ભાગ્યાં, ઘણાં ઘરમાં જઈ બેઠાં,
ઘણાંએ એને અજમાવ્યું, ગજબનું આ વરસ આવ્યું.
સુધાર્યા શીખવી પાઠો, ને કો'ને મૂંઝવી દીધા,
મગજ કોઈનું દંડાવ્યું, ગજબનું આ વરસ આવ્યું.
કદી' 'સાગર' બધાં કષ્ટોય ભૂલી વીરલાઓએ,
વરસને ખૂબ દીપાવ્યું, ગજબનું આ વરસ આવ્યું.
- 'સાગર' રામોલિયા
