બુઝાવો હોળી (અછાંદસ)

આજના હિરણ્યકશિપુઓએ

પ્રજાના મનમાં

સળગાવેલ

ભય,

લાચારી,

ભૂખમરો

ને

લાલચની

હોળીને

શું

બુઝાવવાની

જરૂર નથી લાગતી?

- ‘સાગર’ રામોલિયા

એઈ, કાનુડા!

(૧)

 એઈ, કાનુડા!

હવે તું જન્મ લઈને

લીલાઓ કરીશ,

તો છાની નહિ રહે,

કારણ કે,

તરત જ મોબાઈલથી

તેની જાણ

દરેક ખૂણે થઈ જશે!

(૨)

 એઈ, કાનુડા!

તું જન્મ લઈને

કેટલા કંસને મારીશ?

કારણ કે,

અત્યારે

દરેક મનમાં

અનેક કંસ

બેઠેલા છે...

- ‘સાગર’ રામોલિયા

મૃત્યુ (અછાંદશ)

આમ તો
હવાને કોઈ
રોકી શકતું નથી,
પણ
સમય
પૂરો થાય ત્યારે
હવા
ખુદ રોકાય જાય છે,
તેનું
નામ
આપી દીધું
મૃત્યુ.....

-'સાગર' રામોલિયા

હે, કાનુડા! કાલે જન્માષ્ટમી

હે, કાનુડા! કાલે જન્માષ્ટમી,
તારો જન્મદિવસ!
તને ખબર છે?????

ખબર તો હોય જ ને!!!!!
દિવસોથી બરાડા પડાય છે....

જો તું જન્મ લેવાનો હો,
તો તારા આત્માના
અનેક ટુકડા કરી,
અનેક રૂપ ધરજે!

કારણ કે,
અહીં
અનેક કંસ છે,
બધાને એક સાથે
મારવા પડશે.....

કોઈ બાકી રહ્યો તો...?
ફરી એકમાંથી અનેક...

- 'સાગર' રામોલિયા

ખુરશીનો ઘડિયો

ખુરશી એકા ખુરશી
ખુરશી દુ દાદાગીરી
ખુરશી તેરી તાનાશાહી
ખુરશી ચોક ચમચાગીરી
ખુરશી પંચા પેંતરાબાજી
ખુરશી છક છેતરપીંડી
ખુરશી સત્તા સત્તાપલટો
ખુરશી અઠા અલગપક્ષ
ખુરશી નવા નવી સરકાર
ખુરશી દાણે દમ નીકળે........!
(ખુરશી દાણ દમનગીરી એવું પણ ચાલે
અને ખુરશી દાણ દંગાફસાદ એવું પણ ચાલે.)

- 'સાગર' રામોલિયા

મૌન (અછાંદસ)

ગાંધીજીની પુણ્યતિથિએ
જ્યારે પાળ્યું
બે મિનિટનું મૌન,
ત્યારે
ગાંધીજી આવ્યા સ્વપ્નમાં
ને બોલ્યા,
તમે બધા મૂગા કેમ બેઠા છો?
જવાબ આપવા
મેં ખોલ્યું મુખ,
ત્યાં બે મિનિટ પૂરી થઈ...

- 'સાગર' રામોલિયા

એઈ, કા'નુડા!

એઈ, કા'નુડા!
શ્રાવણ મહિનો આવ્યો,
ને તારા જન્મદિવસના ભણકારા વાગે છે.
પરંતુ, તું જન્મ લેવાનું માંડી વાળ તો?
કારણ,
અહીં નિત્ય નવા કા'નુડા જન્મે છે,
એમાં તને ઓળખશે કોણ?
એ બધા છે તુજથી ચડિયાતા,
તું તો ગોપીઓને રાસ રમાડતો,
આજે તો ગોપીઓને રાત રમાડે છે;
વળી તું ભોળવતો ગોપીઓને વાંસળીથી,
ભોળવાય છે આજની ગોપીઓ
પૈસા અને ફેશનની કાંચળીથી...

- 'સાગર' રામોલિયા